Allanah Ashwell
Ngāti Porou, Ngāti Uepōhatu, Ngāti Awa, Ngāi Tahu, Ngāti Mamoe.BSocSc (Hons), DipT, DipArts
Kei whea mai ngā hua i puāwai mai ai i tā mātou whai i Te Reo Kairangi, i tā mātou piki ake i te rākau taumatua o te reo Māori. Mātāmua pea ko te whakairo i ngā mea moroiti (iti te kupu, nui te kōrero) e whakarākei ai, e kounga ake ai, e Māori ake ai anō hoki te rere o tō tātou reo puiaki. Ka mutu, ko te tuku ihotanga, otirā ko te whāngai atu o ēnei tini akoranga ki taku tamāhine me aku tauira wharekura, koia te whakatutukitanga o ōku wawata.
Aniwa Nicholas
Ngāti Ranginui, Ngai Te Rangi, Ngāpuhi, Ngāti Ruanui, Te Atiawa, Taranaki Iwi, Ngāti Porou, Ngāti HauaBachelor Mātauranga Māori (TWOR), Postgrad Dip Whakaakoranga (TWOR), Postgrad Dip Ahunga Tikanga (TWOR), Masters Mātauranga Māori (TWOR), Diploma Film & Television (Southseas Film&TV), Diploma Kaute (TWOR), Diploma Te Pinakitanga (TWOA), Diploma Adult Education (TWOA) Diploma Mātauranga Māori (TWOR)
Mai i taku tamarikitanga tae noa mai ki te wā nei, kua ōrite taku whāinga mō te reo, arā, kia whakapakari ake i te reo o tōku moana, o Tauranga. He moana papaku, he kokonga tuangi.
Ariana Rēweti
Ngāti Raukawa, Ngāti Toa Rangatira, Te Ātiawa, Ngaa Rauru Kītahi, Ngāruahinerangi, Ngāti Porou, Ngāti TūwharetoaPoutuarongo Kaute (TWoR 2011), Bachelor of Laws (VUW 2016), Poutāhu Whakaakoranga Akorau (TWoR 2018)
E kore rawa e kapi i te kupu te nui o ngā hua kua puta i taku whai i te tohu nei. I tae atu ahau ki te whai kia kairangi te reo, ā, he kairangi te kai i whāngaihia mai e ngā mātanga reo i ia wānanga! I whāia te tohu nei mō tōku whānau te take, mō tōku kura te take, mō ōku hapū me ōku iwi anō hoki te take i runga i te hiahia nui kia whāia te tauira o ō mātou kaumātua, o ō mātou pakeke kia whakapakarihia tonutia te reo o ngā tini whakatupuranga uri; e ora ai ō mātou marae, e whakaūngia ai te mana motuhake hoki. Nō tōku reanga te māri i ngā whakakitenga o ō mātou kaumātua kia ora anō ai te reo me ngā tikanga ki waenga i ō mātou iwi o te kotahitanga ki te tonga. Ko mātou kua rongo rawa ki te reka o ngā hua rā. Heoi anō, kei noho noa mātou i te hāneaneatanga o ā rātou mahi nui, ka tika kia whai taku reanga i ngā ara hei whakawhanake tonu i ngā wawata rā, hei whakatinana tonu i ngā mātāpono i whakapūmauhia e rātou. Ko Te Reo Kairangi te kaiwhakaaweae i ahau, i ngā mumu reo o Whakatupuranga Torumano!
Benjamin McGee
Ngāti Porou, Ngāti Tamaterā, Tokelau, Kuki Airani, Te Iwi MōrehuTe Pīnakitanga, Te Tohu Mātauranga, Toi Reo Māori ā-tuhi/ ā-waha
Ko te reo Māori tonu, te aho tāngaengae e here tahi nei i a tātau ki te whenua. I ēnei wā nei, ko te take nui e whakahokia mai ana ngā uri o Matakāoa ki te wā kāenga, ko te tangihanga, ko te hui mate. Mā mātou ko ōku, tēnei here hei motu. Ko te one o te kāenga te māra hei keri ake mā mātou. Ko te reo Māori anō, te kō. Ka tāmatahia, ka tiritiria te papa kia haumako, e manahua anō mai ai te urupuia pōhutukawa i Te Waha o Rerekohu. Mā ōna pua kura ngā uri kei te whenua hei whakapoapoa mai, kia hoki. Ko te reo ora, ko te korou ora o te wā kāenga te take.
Berend Quirke
Ngāti Rangi, Uenuku Manawiri, Te Ati Haunui a Pāpārangi, Te Wainui a RuaProgramme Lifecycle Subject Matter Expert (Assessment & Moderation) - Te Reo Māori
Ko ōku wawata mō te reo, kia noho mātāmua mai te reo Māori i te arero o Ngāi Māori, o tōku whānau ake, o ngā tāngata e kaingākau nui ana ki te reo. Kia hoki anō te reo Māori hei reo kōrerorero i roto i ngā kāinga o tēnā whānau, o tēnā whānau, kia rangona whānuitia te reo Māori i roto i ngā hapori puta noa i te motu. Heoi anō tāku he whāngai atu, he tuari atu i te reo e tutuki ai ēnei wawata ōku kia ea ai te kōrero ‘Ko tōku reo taku mapihi mauria’
Breanna Mataira
Ngāti Konohi, Ngā Puhi, TainuiTe Aho Matua Kura Kaupapa Māori Bachelors - Teaching
Ko taku wawata mō te reo - kia tipu te hiahia i roto i tēnā Māori, i tēnā whānau, i roto i tēnā hapori ki te ako i tōna reo - e tangata whenua ai, e pūmau ai tō tātou reo ahakoa ki hea haere ai te tangata. Kaua mō te orangatonutanga anake te take, engari kia eke, kia tika, kia kounga.
Charity Edwards
WaikatoProgramme Lifecycle Subject Matter Expert (Assessment & Moderation) - Te Reo Māori
Ko tāku noa ko te whakatupu tamariki, ko te whakatupu mokopuna i te reo Māori! Mā tēnā ka papata anō te reo ki ngā wāhanga katoa o taku hapori.
Devon Wikaira
Ngāpuhi, Te Hikutū Te Aho Matua Kura Kaupapa Māori Bachelors - Teaching
Ko taku wawata mō te reo - kia tipu te hiahia i roto i tēnā Māori, i tēnā whānau, i roto i tēnā hapori ki te ako i tōna reo - e tangata whenua ai, e pūmau ai tō tātou reo ahakoa ki hea haere ai te tangata. Kaua mō te orangatonutanga anake te take, engari kia eke, kia tika, kia kounga.
Donny Te Kanapu Anasta
Ngāi Tūhoe, Ngāti Tūwharetoa, Te Whānau a Apanui, Te WhakatōheaBachelor of Education – Māori Language Medium, Te Panekiretanga o te Reo Māori, Te Tohu Toi Reo Māori, Adult Teaching Certificate Level 5
Ko te tauira te tino kaiwhakaako – tuatahi ake, ko te noho ōku hei tauira o te tangata i ahu mai i te korekore ki tētahi taumata e autaia tonu nei te matatau.
Ko te kawe hoki i ērā tauira, i ērā pūkenga, i ērā māramatanga ki ngā kokonga pōuri o te whare kia mārama ai, kia whānui kē ake ai te kitea, arā, ko kōkirihia o te reo me ngā tikanga ki ngā horopaki me ngā kaupapa e tauhou nei te reo me ngā tikanga kia whānui kē ake ai te ao Māori e pakeke nei ā tātou tamariki-mokopuna.
Hamuera Tamihana
Te Ātiawa, Ngāti MutungaTe Tohu Paerua ki Te Reo Kairangi, Te Pīnakitanga ki Te Reo Kairangi, Te Tohu Paerunga ki te Whakaako ki ngā Kura Tuarua - Te Whare Wānanga o Waikato, Te Tohu Paetahi - Nō Te Whare Wānanga o Waitaha
Ko tāku noa e wawata nei, kia ora katoa te reo Māori i ngā wāhi katoa o taku ao i runga i te tika me te māramatanga ki ngā āhuatanga o te reo, ki ngā tikanga anō hoki. Kei te pīrangi hoki kia kitea e aku tamariki e whai hua ana tēnei reo rōreka o tātou huri noa i Aotearoa. Ko tētahi hua nui o taku whai i tēnei tohu, kua tika rawa ake taku whakamārama i ngā āhuatanga o te reo ki āku tauira, ki ōku hoamahi anō hoki kia tika, kia rere, kia Māori.
Hemaima Rauputu
Ngāti ManiapotoBachelor of Laws, Bachelor of Arts (Te Reo/Tikanga), Master of Laws
Tērā te wā i pāorooro mai ngā pari kārangaranga o te kāinga i te reo taketake. Kua roa tō mātou whānau e noho pani ana, e mate kanehe nei kia whakahokia mai tō tātou reo. Ko ōku wawata mō te reo he whakaohooho i te mauri tūpuna, i te arero tūpuna i tōku ake pā harakeke. Arā te kōrero; nōku tēnei reo, nā ōku tūpuna mai ki a au, ā, māku atu ki āku e tupu ake nei. Māku te haepapa e kawe, kātahi ka tukuna atu ki aku tamariki, e tautau ai ngā ahi o te reo kia pūkākā, e hōkai, e topa.
Joseph Ramanui
Ngāpuhi, Ngāti AwaB. Ed Teaching (Māori), Dip. Teaching KKM
Kua whakahokia ētahi o ngā akoranga o tēnei kaupapa ki te kāinga, ki taku wāhi mahi nōki, ā, e kitea ana ngā hua e tupu mai ana i roto i taku whānau, i ngā hapori reo e noho nei ahau.
Kia Nukutawhiti te reo o Te Tai Tokerau.
Kōkā-Hauwai Turei
Te Aitanga a Hauiti me Ngāti Porou.BA, Postgrad Secodary Teaching Dip, Postgraduate dip Hōaka Pounamu | Māori Bilingual and Immersion Teaching and Learning
Mā te oneone mōmona e tipuria ai te reo purapura — i ruiruia mai ai e ōku wheinga — tērā ka mātātupu he whāngai rangatira, he tupu toro nuku toro rangi. Ko ōna hua ka nunui ka pakari, ka whakamārokengia ai hei oko pupuri waiora mō aku Kairangi.
Leilani Naera
Ngāti Kahungunu whānui (Turakirae ki runga, Paritū ki raro - ko Kahungunu e eke nei), Ngāti ManawaTohu Paetahi: Reo Māori me Ngā Tikanga; Ngā Mana Whakairo a Toi; Tohu Kaiako.
Kia māori ake, kia kounga ake te kōrerotia o te reo e ōku take… tēnā i tāku. Kia mōhio, kia mārama pū, kia whakapono nui hoki āku hua ki te hira, ki te āhuareka o tō tātou reo Māori… pēnei i a au. Kia toa taua āku kawariki, mō te reo kia tika, kia rere, kia Māori ake nei… me ko ōku tohunga i tū ai Te Reo Kairangi.
Louise Whaanga
Ngāti KahungunuBachelor of Laws, Bachelor of Arts (Māori), Bachelor of Arts (Honours)
Ka kimi noa, ka rapa noa. I tōku reo ka ngaro nei i taku iti, i taku rahi. Ka kimi noa, ka whawhai roa. Kia whakahokia tōku reo ki ngā arero o āku, kia tukuna iho ai ki ngā uri, ā haere ake nei. Ka mihi rā ki te kura nui, ki te Tohu Paerua o te Reo Kairangi, Ki te tokotoru o maunga tiketike e manaaki nei i te kaupapa. Tēnei te rangapū tuarua kua whakangungua ki te rākau, ki te pene. Tēnei te pia ka whakahoki i ngā taonga nei ki te hunga hiakai o te kāinga.
Mana Epiha
Ngāpuhi, Waikato, Ngāti KahungunuTe Tohu Paerua o Te Reo Kairangi
E tika ana hoki te kōrero, he tohu tēnei hei whakahoki māku ki ōku hapori. I runga i te whakaaro, ko te reo te Mauri o te mana Māori, ā, ko te kupu te mauri o te whakaaro, anei ahau e whakahoki nei i taua mauri ki ōku hapū e hiakai ana ki te kai apungapunga nei o te reo. Ngāti Kura, Ngāti Rēhia, Te Patuharakeke, Te Uriroroi, hena, kawea ake ki te kōmata o te rangi!
Mason Lawlor
Ngāti Pāhauwera, Ngāti MaruBA Te Reo Māori, Toi Reo Māori
I kairangi te ngao matarikitia mai o tō mātou kahupapa e ngā kaiako, nā reira hei utu i tēnā mahi, me kairangi hoki te whakahokinga atu o tā mātou i ako ai ki ō mātou hapori. Hāunga te ngaotia o te waka, nā tēnei tohu kua whai kōmaru ngā waka o tō mātou kahupapa. Ko te kōmaru tērā o reo kia ora, ka pūhia e te hau e tere ai ō tātou waka i runga i te wai o whakarauora reo. Nō reira, kei ngā ringa ngao o ō tātou waka, kei ngā ringa mahi kōmaru, me mihi rā, me mihi rā.
Matawai Winiata
Ngāti Raukawa, Ngāti Kuia, Ngāti Whakaue, Ngāti Awa, Ngāi Tahu.2018 - Te Wānanga o Raukawa: Poutuarongo Whare Tapere - Bachelor of Māori Performing Arts. 2023 - Te Wānanga o Aotearoa: Te Pīnakitanga ki te Reo Kairangi
Poia atu taku poi, Whata atu koe ki te rangi. Wania atu taku poi ki te kō i titia e ōku kaumātua o te Rua Mano ki te one o reo kore. Papatairite atu ki te manahuatanga ake o Te Kākano o te Kura, o Te Rito. Ka tirotiro ki te hinu Raukawa, ka ranga tonu ki Te Reo Kairangi te mahuta mai nei. Hura mai ko Tohu Paerua, puāwai ko ngā pae ki tua. Hura mai ko Tohu Kairangi, puāwai ko te reo o taku hapori. Hei aha rā? Hei mana mō te reo Māori. Pōtaea, e poi e!
Matewai Hahau-te-rangi Te Āio Whare
Ngāti Porou, Ngāti Kahungunu, Raukawa Bachelor of Teaching
E māri nui ana i te kounga o ngā whakamāramatanga a Pānia rāua ko Heketū e whanake ai au hai kaiako. E koroingo nei au ka whānau mai ana āku mokopuna ka kore te Māori e mate ki te ako i te reo Māori, he tika kē nō te reo o te iwi. E kitea ana te rongoā o te reo, e whakamahungia nei ngā marūtanga i hua mai i te tāmitanga e kore ai ngā mokopuna e rongo i tērā.
Mere Clendon-Smallman
Ngāpuhi, Waikato, Raukawa DipTchg KKM, PGDipEd, BMPA
‘Ko te reo te taikura o te whakaao mārama.’ Kua tā ngā akoranga o Te Reo Kairangi i te manawa, pūrena tonu taku kapu. E ea ai te werawera o Tā Tīmoti, o Te Heketū, o Pania me heke te werawera o Tāne te-wānanga. Ā, ka whakahokia ēnei tongarerewa ki tōku whānau, ki ōku iwi, ki āku ākonga, ki āku mokopuna nōki. Kua hihiri te aroha ki Te Reo Kairangi ka mutu, e kore e oti ai tēnei mea ko te ako i te reo Māori, ai ua, ai hau, ai marangai, kōkiri!
Michelle Treadaway Ohia
Ngāti Kahungunu, Rongomaiwahine, Ngāi PākehāDiploma of Teaching, Bachelor of Education, Te Pīnakitanga ki te Reo Kairangi
He tuarā i hake, he tōhau i heke, he hua nui i puta. Nā te kaha ū ki ngā akoranga o te tohu nei, i Māori ake ai tōku hinengaro, tōku wairua me tōku arero. Me mihi ka tika ki ngā pūkenga e kaha whakaatu ana i te kauhanganui o te reka me te mamae. Nā ēnei wheako katoa, kua māia ake te manawa, kua pakari ake te hirikapo, kua kiri tuna ake ahau. He tōmina nōku kia māori ake te rere o te reo puta noa i ā māua mokopuna, tae noa atu ki te whānau whānui tonu.
Mihi Hope
Ngāti Wairere, Ngāti Mahuta, Ngāti Te Ata Te AhiwaruBA, Post Grad Dip Teaching, Post Grad Dip Education
E kore tēnei whakaoranga e huri ki tua o aku mokopuna!
Kawea te reo Māori ki Hawaiki hōu hei ō manapou hei oranga mō ngā uri whakaheke.
Moenohotu Maui
Raukawa, Tūhoe, Ngāti AwaBachelor of Arts, Graduate Diploma of Secondary Teaching, Te Tohu Paerua o Te Reo Kairangi
Ko te reo kia tika, kia rere, kia Māori tāku e whai nei, ā, e tumanako ana ka ora tēnei wawata ōku i aku uri whakaheke, i aku marae hoki, ahakoa ngā toimahatanga, ahakoa ngā pēhitanga o te ao hurihuri. He hua au nā taku iwi o Raukawa, ehara i te mea ka mutu taku ara whakanikoniko i taku reo i kōnei engari kei tētahi o ngā kura o te iwi au e whakaako ana, otirā, ko ngā mātauranga kei a au ka whāngaihia e au ki ngā uri o te iwi me aku uri ake.
Ngairo Eruera
Ngāti Ranginui, Ngāti Awa, Ngāti TūhoeMA (Māori)
Kia kaua āku mokopuna e mate ki te ako i te reo, hei reo matua mā rātou.
Engari, mā te reo anō ia, rātou e whakatipu.
Ngapera Aperahama
Muriwhenua, Ngāti Tūrangitukua, Ngāti Pikiahu-Waewae, Ngāti Whātua, Taranaki, Te Ātiawa, Te Iwi MōrehuTe Pīnakitanga ki te Reo Kairangi, Toi Reo Māori (Whakamāori ā-Tuhi), Te Tohu Paerua o te Reo Kairangi
Huihuia mai, tuituia mai ngā tini awhero o mātāpuputu mā, kia tōia mai, kia ū mai ai tō rātou waka whakapono ki uta! Ki a Tama-i-te-ao-Mārama!
Ko te reo Māori tonu te taukaea e tōia mai ai te toiwhenua i tūmanakohia e ngā mātua tūpuna. Heoi anō tā te mokopuna nei, he whai ake i ngā tapuwae i waiho mai rā e rātou. Kia tatū rā anō te whakakitenga!
Hoki ki te whenua
Whakatipu pā kōrari
Hei whenua haumako e manahua mai anō ai te reo o ōku tūpuna!
E kō kōia, e ara e!
Nicholas Fonotoe
Hāmoa, Te Iwi Mōrehu, Ngāti Apa, Ngā Rauru, Ngāti Tūwharetoa, Ngāti WhakaueTe Aho Tātairangi - Bachelor of Teaching (Massey University - Te Kupenga o Te Mātauranga). Ngā Mana Whakairo a Toi - Bachelor of Māori Performing Arts (Te Whare Wānanga o Awanuiārangi). Poutāhu Whakaakoranga - Postgraduate Diploma of Teaching (Te Wānanga o Raukawa). Toi Reo Māori - Kaiwhakamāori ā-tuhi (Te Taura Whiri i te Reo Māori).
Neke atu i ngā reanga e toru o tōku whānau e kōrero Māori ana - koirā te pae tawhiti. Ko te pae tata, kia ū tonu ki te reo Māori hei reo kōrerorero i ia rā i waenganui i a mātou ko āku tamariki. Ko te tino hua hei whakahoki māku ki ōku hapori ko tōku māia ki te tū hei māngai mō rātou, hei kaiwhāngai hoki i te hunga pīkoko ki te reo Māori.
Pere Wihongi
Ngāpuhi, Ngāti Kuri, Te Rarawa, Ngāti Kahu, Ngāti Wai, Ngāti Rehua Bachelor of Māori Performing Arts, Diploma Media Studies
Ko te reo te mauri o te mana Māori, kia mauri roa, kia mauri tapu, kia mauri ora te reo Māori, hēre nei te wā
Ranea Aperahama
Muriwhenua; Te Pātū; Ngāti Whātua; Ngāti Tūwharetoa; Ngāti Awa; MōrehuToi Reo Māori; Bachelor of Art Māori Carving
Mā te oneone mōmona e tipuria ai te reo purapura — i ruiruia mai ai e ōku wheinga — tērā ka mātātupu he whāngai rangatira, he tupu toro nuku toro rangi. Ko ōna hua ka nunui ka pakari, ka whakamārokengia ai hei oko pupuri waiora mō aku Kairangi.
Rāniera Harrison
Te Aupōuri, Ngāti Porou, Te Whānau a ApanuiBachelor of Arts (Māori Development), Bachelor of Māori Performing Arts
Ko te reo kia tika, ko te reo kia rere, ko te reo kia Māori, ko te reo kia mārama.
Rapaera Tawhai
Tūhoe, Te Whānau a ApanuiBMPA, Dip Film & Television, Dip Graphic Design, Te Panekiretanga
Ko te wawata ia kia rangona whānuitia ahakoa ki hea i tēnei ao. Ko tāku he whai wāhi atu kia mōhio ai aku tamariki, he huarahi mutunga kore te ako i tō tāua reo. Mā te tohu nei e pakari ai taku whakaako me te whakatairanga i te reo ahakoa te rāngai mahi. Maie! Tuuuuuku!
Regan Paranihi
Ngāti Tūwharetoa, Ngāti Raukawa, Ngāti Hauiti, Ngāti ManiapotoTe Tohu Paerua o Te Reo Kairangi
Ko ōku wawata kia māori noa te rere o te reo Māori ki tōku anō whānau, otirā te hapori. Kia māori noa te mōhio, te mārama me te mātau ō āku irāmutu ki tō rātou reo taketake me kore noa e whai hua ai tāku e wawata nei.
Riana Te Ngahue
Ngāti PorouBachelor of Laws Bachelor of Arts majoring in te reo Māori
Ko aku wawata mō te reo kia māmā noa te whai wāhi atu a ngā tamariki Māori ki tō tātau reo i te kāenga, i te kura anō hoki. Kia nui ake ngā huarahi hei whai mā ngā tamariki, me ngā mātua e ora ai te reo ki rō kāenga.
Ritane Wallace
Ngāti Tūwharetoa, Ngāti Kahungunu, Ngāti Hāua, Bachlor of Arts, Masters of Māori and Pacific Development
Ko te reo e tīrara ana i ōna taupae ki ōna tahataha he reo e rongo ana, e hari ana. Kōina pea te wawata nui ōku mō tōku whānau, ā, tae rā noa iho ki ngā hapori e noho nei au.
Rutene Gabel
Te Paatu, MuriwhenuaTe Panekiretanga o te Reo Māori - Rangapū Tuaono, Master of Arts majoring in Te Reo Māori Waikato University, Post Graduate Diploma in Business and Administration, Auckland University
Nā Te Reo Kairangi e whakairi matamata nei tōku waka tuere ki te pae o māramatanga.
Sharee Adam
Ngāti Korokī Kahukura, Ngāti Paoa Bachelor of Commerce major in Marketing Management; Master of Indigenous Studies.
Kotahi kapua ki te rangi, he marangai ki te whenua.
Kua whiti te rā ki tua o kahurangi.
Kia kore koe e ngaro taku reo rangatira.
Ko ngā tūpuna tonu e whakataki ana i tēnei kapua i te rangi kia waipuke ai te whenua i te pāteretanga mai o te ua, otirā, ko ngā tūpuna kua whitia kia whakawairehutia ngā kura i te mata o te whenua kia whakapipitia ki te rangi. Nā tēnei tohu i pūhakehake mai ai te puna wairehu i te rangi ki ngā kura, nā konā kua rite anō tēnei pōkēao ki te tuku i ngā pata wai ki ōku nei hapori.
Takoha o ngā atua Ropati
Ngāti Hine, Ngāti Ranginui, HāmoaBachelor of Sport and Recreation
Ko te reo te mauri o te mana Māori, te kākahu o te whakaaro, me te ara e tūhonohono ai tātou ki te ao tūroa. Ko taku tino wawata kia whānui ake te rangona me te kōrerotia o te reo, ā, kia whakapūmauhia te mauri o Te Reo Māori i ngā horopaki katoa i tōku ao, hei oranga mō ngā kāinga me ngā hapori whānui o Whare Tapu o Ngāpuhi, i Tāmaki ki Te Rerenga Wairua. Nā tēnei kōhi i nui ake rā te mātauranga ki Te Reo Māori, me te aha kua whānui ake te whakamahinga āku ki ngā tini horopaki i tōku ao.
Te Amohanga Rangihau
Tūhoe, Te Arawa, Ngāti PorouHe Waka Hiringa Masters in Applied Indigenous Knowledge/Bachelor Environmental Management/Diploma Māori Governance & Leadership/
Nā te tohu nei i whānui ake ai aku tirohanga ki te reo. Ko te mea nui mōku, he whakaūkaipō i te reo Māori ki tōku kāinga i te tuatahi, kātahi ka tuari i ngā mātauranga iti kei ahau ki aku matamata huānga mā roto i ngā kawenga mahi a Te Hui Ahurei a Tūhoe.
Te Ara Rīpeka Rangihuna
Ngāti Porou, Ngāti Kahungunu, Ngāti TūwharetoaBA Māori, BA Honours, Post Grad Diploma Whakaakoranga Akorau
Nā tēnei tohu i tino ora ake ai te reo Māori i taku whānau. Nā tēnei tohu i whai hoa mauroa ai au. Nā tēnei tohu e eke nei ngā wawata i tukuna ki a Hiwa-i-te-rangi
Te Hauora Gatonyi
Ngāti Tahu-Ngāti Whaoa, Ngāti Tūwharetoa.Poutuarongo Whakaakoranga (Bachelor of Teaching - Māori Medium) @Te Wānanga o Raukawa, 2019. Te Toi Reo Māori ā-Tuhi (Certificate of Competency in Translating the Māori Language) @Te Taura Whiri i te Reo Māori, 2022
Ko tōku nei wawata, kia rere māori noa iho ai te reo Māori i ngā kāinga, i ngā hapori, i ngā wāhi mahi, i tēnā me tēnā whakatipuranga hoki. He tūāpapa noa iho tēnei tohu e pakari ake ai taku whai kia kaha tonu te rere o te reo Māori. Mā ngā pūkenga me ngā akoranga o te tohu nei ahau e ārahi ki te hāpai ake i ōku hapori nei, i ngā uri whakatipu, kia kairangi ake ai te reo Māori e kōrerohia ana. Mauri ora.
Te Ika Pounamu Jymal Morgan
Ngāi Tahu, Te WhakatōheaMasters of Māori and Pacific Development (MMPD)
Ko te wawata ia, kia kaua te reo Māori e rere noa, e tika noa, e Māori noa, ki waenga i te tokoiti kounga engari kē ia, kia hōrapa, kia tangata whenua, kia arohatia nuitia huri noa i te ika tapu a Māui Tikitiki a Taranga, i te Waka o Aoraki. Ko te wawata ia kia taiki ngapara te aro atu o te iwi Māori whanui ki tōna arero tūpuna hei whakarākeitanga mōna i tēnei ao tūwhitiwhiti, tūnekeneke.
Te Paea Ngāpō
Ngāti Tamaterā, Ngāti Maru, Ngāti Pāoa, Ngāti Pūkenga, Ngāti Porou, RangitāneTe Whare Wānanga o Waikato - Bachelor of Business (BBus), majoring in Finance with a minor in Project Management. Te Wānanga o Aotearoa - Diploma: Te Pīnakitanga ki te Reo Kairangi, Diploma: Te Aupikitanga ki te Reo Kairangi, Certificate in Adult and Tertiary Teaching, Certificate in Personal Financial Capability and Financial Services, Certificate in Rongoā Māori
Ko Marutūāhu kōwhao rau, ka whakangau tonu atu! Ko ngā akoranga me ngā hua o tēnei kaupapa ka whakahokia atu ki ngā iwi o Hauraki, ki Te Whare Tāhuhu Kōrero o Hauraki, me ngā tini wānanga reo puta noa i ngā ripa tauārai o Marutūāhu. Ka noho ēnei mātauranga hei kuru tongarerewa mō te hunga kua roa e whakamomori ana kia ora tonu ai te reo Māori me ngā tikanga, me kore ake he hua ka puta.
Te Rongopai Channings
Ngāi Tūhoe, Te Arawa, Ngāti TūwharetoaBA ki Te Whare Wānanga o Waikato. Te Pīnakitanga 2019 (TWOA) Tohu whakapakari pakeke hei kaiako (TWOA Adult Education diploma) Te Reo Kairangi
He nui ōku wawata mō te reo, engari ki te tīpakohia tētahi, arā, ko te tangata whenua noa o te reo Māori ki roto ki ngā kāinga maha huri noa i a Aotearoa whānui. He moumou pea te ākona o te reo Māori ki te kore e whāngaihia atu ki te whānau i te kāinga, ki ngā tini hapori, ki hea ake rānei. Koirā pea tētahi hua o te whai i tēnei tohu. Kaua noa iho ko te aro ki te kairangitanga o te reo, engari, ko te whakahoki i ēnā mātauranga ki ā tātou iwi maha. Koirā te kairangitanga ki a au.
Teaonui McKenzie
Ko Raukawa te iwiKo tāku he ruirui i ngā purapura kua whakatōkia ki taku māra kia puawai mai ai he whakatupuranga anō e rite nei ki a tātou te waimarie. Me kore noa e kitea e tētehi, he huarahi anō kia pārāwera nuitia te reo, kia whakareia te kakara o te iwi Māori, kia eke te reo me ōna tikanga ki te taumata i wawatatia ai e ngā taniwha hikuroa o te reo, e tūnohunohu mā.
Ko taku wawata, mā te mōhio ki te reo, ka māori ake ai ngā whakaaro o tēnā, o tēnā o tātou, ki reira whakatutukiria ai ngā wawata o tōku kuia, nāna ki ahau tēnei taonga, māku ki a Pikipiki Ake.